Tuesday, January 4, 2011

adat Pemati Kitai Mensia


Bahasa Iban - Pemati Kitai Mensia

dibai ngagai kita MY PAGE BOOK
Nitihka pengarap bansa Iban, udah kitai parai dia semengat kitai pulai ke menua siti ke dikumbai Sebayan. Taja pia, semengat sida ti nyadi manang enda pulai ke Sebayan lebuh sida mati tang pulai ke tuchung Bukit Rabong.
Bukit Rabong tu tumbuh di tebing Batang Ketungau, pati Batang Kapuas. Bukit tu tinggi sereta renjan. Bukit tu ulih peda ari menua pegai Sri Aman ke diatu laban bukit tu tumbuh ba garis entara menua Sarawak enggau Kalimantan, Indonesia. Bukit Rabong tu meh endur Ini Inda Rabung Menua, Ini Inee Rabung Hari diasuh Sengalang Burung mangun Menjaya nyadi manang. Bukit tu mega alai Engga seduai Challa nabanka anak seduai rari enggaika mati laban baya nitihka ti dipadah Kumang seduai Lulung ngagai Engga.
Menua ke dikumbai Sebayan tu iya nya di Batang Mandai Mati tauka Mandai Jenuh. Endur menua Mmaandai Mati tu kenu ke jerita tuai iya nya ba entigis entara menua Batang Kalis enggau Batang Mandai. Sungai dua iti tu sama bela mati ari Batang Kapuas di Kalimantan Barat, Indonesia Borneo.
Batang Mandai ke ulih peda kitai mensia tu dikumbai Mandai Idup, iya nya Batang Mandai iya ti bendar. Agi keli kenu ku jerita; kukuk manuk, ruik babi, munyi gung, tawak, bebendai, engkerumung, gendang enggau nyawa mensia richah rami suah didinga orang ti nguan menua Batang Mandai tang meh tubuh mensia nadai dipeda. Reti nya sungai ti dikumbai Mandai Mati tauka Mandai Jenuh tu endang begulai tauka nyaruk Batang Mandai tang meh enda ulih peda kitai mensia diri tu. Entara menua kitai ti idup tu enggau menua Sebayan semina nebal kulit terung aja. Kulit terung tu ba pengarap tuai endang iya kulit mata kitai mensia. Nya meh kebuah lebuh mata kitai badu kekesap (parai), kitai lalu terengkah di menua baru ke dikumbai menua Sebayan.
Pejalai semengat kitai Iban ke Sebayan endang neresa mayuh menua nyengkaum Andau Titi Rawan. Andau Titi Rawan tu kenu ku jerita, badas memelan mesai leletan Ini Manang. Iya mega dikumbai orang “titi begilik dindik dulu lelunggik tesungkang punggang”. Pun iya muak ke Iban lalu ujung tauka puchuk iya muak ke Sebayan. Nyangka Andau Titi Rawan tu meh utai ke dikumbai sida ke megai pengarap Islam nya Al-Sirat al-Mustakim tauka titian sirat.
Kala enda kitai ninga cherita pasal orang ke udah parai, benung diberi mandi tang ngeleda idup baru ? Tauka benung disenggai di ruai tang udah nya idup baru ? Bisi kala ninga orang sakit raya nya udah nadai seput agi, iya meh benung orang beterauh nyabak, dia iya ngeleda lalu pulai gerai ? Pengudah ke gerai, iya lalu nusi pejalai iya ke sebayan lalu betemu enggau niang aki ini tauka kaban belayan ke endang udah lama nadai.
(Diambi ari, Majalah Pegari-Pengerawang Ati Penerengkah Di Sebayan; Vol. 17, taun 2006.
(a) Terangka reti leka jaku tauka rambai jaku di baruh tu. (6 mark)
(i) garis entara -
(ii) entigis -
(iii) memelan -

(b) Saut tanya di baruh tu belalauka isi karang di atas. (14 mark)
(i) Nama batang pekara ti dikenang dalam karang di atas ? (2 mark)
(ii) Dini semengat sida ke nyadi manang pulai lebuh maya sida iya udah mati ? (3 mark)
(iii) Nama penampak rita Bukit Rabung dalam genteran karang di atas, lalu padahka pengawa ti bisi nyadi dia dulu menya ? (3 mark)
(iv) Nama utai tumbuh ti dikena nyemaka penyemak menua Batang Mandai Mati tauka Jenuh ari kitai mensia ? (2 mark)
(v) Padahka nama reti rambai jaku ““titi begilik dindik dulu lelunggik tesungkang punggang”dalam genteran karang di atas. (2 mark)
(vi) Nama tipak leka jaku bukai dikena madahka reti Andau Titi Rawan ? (2 mark)

0 comments:

Post a Comment

Related Posts Plugin for WordPress, Blogger...

My widget | Bookmark | Share

Marketing Blogroll Center

Followers

Blog Archive

 

Copyright 2011 Iban4u My theme by Timberland, J.

hit me

Total Pageviews

Disclaimer

This blog does not host any of the files mentioned on this blog. This blog only points out to various links on the Internet that already exist and some of them are uploaded by other websites or users there. If you have any clarifications to be made or If you find any contents in this site which you think can be offensive contact me & the content will be removed or modified accordingly.

Visitor

hit counter account login page
Get a free hit counter today!
get this

analyzer

SEO Stats powered by MyPagerank.Net