Cherpan iban - Cherita Tua Nengah Lagu

Cherpan - Cherita Tua Nengah Lagu

Disusun semula oleh MY PAGE BOOK

“Hello” ko orang ba telipun nya. “Hello, sapa tu?” aku nyaut iya. Te enda kala aku ninga sera nyawa baka lelaki ke benung berandau enggau aku tu. Sapa enda meh ia tu neh? Aku bertanya dalam ati aku empu.

“Aku tu, Leo. Petunggal Mathew”

“Oh! Nuan nya Leo?” Nyeh…nya baru aku teringat ke petunggal suluku, Leo nya. Teringat ke maia Thew mai aku pulai ke rumah bala ia ba Tudan dia. Rumah endar ia ba Suai, Niah, rumahpanjai deh. Enti maia ia pulai ari upso (offshore) ia pulai ke rumah bala ia nya. Laban enggai pulai katas kin, enda alah urang tak emergency call ngasoh nurun ke laut enda ulih kuntik ia. Leo…sigat diri gak orang menoa. Kurus tinggi, buk kuning. Sigi style nembiak diatu meh nya. Smart gik ia nya…ia ke manah endar, ia rajin sembiang ari minggu. Anang aja rajin sembiang tang rajin gak ngaga penyalah. Dini kak nyadi nya. Ngaga-ngaga penyalah udahnya ari minggu sembiang ngampun dosa. Dah diampun ngaga penyalah baru gak. Akai dai…pedis endar isi bakanya.

Tuchum-tuchum bala urang di rumah dia ngambat aku. Aku pan tuchum laban malu kediri dibai urang laki pulai ke rumah. Hai wai…sapa enda malu ti betemu enggau “bakal” ipar munyi ko laut. Akai dai…te tin burak ah di tunga urang tu. Ko anak ati din. Sigi gaya kitai iban gak, enda tau betunga ati diri. Enda tau tinggal ai bepupu’ nya ga. Enti di nah ke ai urin…suri meh sigi enda dikemuning ke urang. Heh..urang lelaki ko aku wai…hehehe…urang indu lain agi gak panjung ke indu neh..sigi ai manis nya meh diruntu..hihihi..

“Wai, agi dia nuan?” Akai…tekenyit ninga nyawa Leo. Enda ingat ke diri benung betalipaun enggau ia. Nu tembu mulai ke pengingat lama enggau sulu. Ah…enti dikenang, amat cukup pengerindu maia ti bepangan enggau nuan bujang.

“Agi Leo, ditu meh aku. Nama utai deh? Te enda kala nuan tu telipun aku. Tentu bisi endar neh?” aku tuchum-tuchum. Engka te bisi pesan berat ari apai tuai kini. Ehem! (Tuchum lelegup)

“Enda nemu aku kati kak madah. Tang enggai nyadi enda gak aku madah ke nuan. Badu meh nuan ngiga Thew agi” Tekenyit aku ninga Leo madah munyi nya. “Ya nama kebuah deh Leo?” “Thew udah bebini” Te asai ke dipandam dada, asai ke turun darah mua ninga berita ke di bai Leo. Nama tu penguji ke diberi petara? Aku enda arap ke berita tu. Nyangka sida Leo deka bemain enggau aku. Tauka sekali sida ia deka nguji ati sereta pengerindu aku ke Mathew. Tauka sekali sida ia nagang pengerindu kami?

“Amat nuan nya Leo? Anang ngemula ke aku kitak” enggau sera nyawa ti begetar aku bejako.
“Amat ah! Dini meh kami tu kempang deka ngemula ke nuan. Sapa urang enda nemu seduai bepangan. Nadai meh kami deka ngemalu ke nuan…enti nyema kami ngemalu ke nuan, reti ia kami ngemalu ke diri empu”

Aruh meh ngelama tu aku selalu bemimpi rawan, bemimpi ke semetak ketupong kanan. Enda meh aku nemu nuan sulu udah beduan ti ngujung ke pengerindu tua puntan :cry: Aku mina ulih nyabak dalam ati.

Aku diau aja ninga utai ke dipadah Leo. “Teruska dia meh Leo, aku sedia ninga semua ia”

“Thew madah seduai sarinya belaya, namanya amat kini?”

Aku nusoi ngagai Leo utai ti nyadi lebuh nya…

Maia Mathew nurun ke laut, ia bisi telipun aku…

“Aku deka ngasoh apai indai aku nurun ke Miri, betemu enggau nuan.” Ko Mathew ngepun ke randau tua ia.
“Ya lapa deh?”
“Ngasoh sida ia nanya nuan. Ngambi ke jampat agi tua beterang”
“Nuan anang maioh macam Thew. Aku tu empai bersedia deka niri ke rumahtangga. Umur agi ga biak amat, tambah mega aku deka ngiga kerja tetap”

“Nama nuan enggai jadi enggau aku? Aku enda ngira, bersedia meh nuan ari 6 tu sida ia kia”

Majak gak Mathew ngansak. Aku udah enda nemu agi. Petang asai dunya tu. Puas aku berunding. Enti aku nerima utai ko ia, tanda ia aku mina ngancur ke pengidup aku. Enti aku enda nerima ia, mesti ia ngumbai aku enda beamat dalam besulu nanggam pengerindu enggau ia.

“Enda ulih aku Thew. Anang ngemalu ke apai indai aku, kelebih agi apai indai nuan. Enti nyema bala nuan datai sekali pan, aku tetap enda nerima. Ari sida apai indai nuan pulai enggau jari kusung. Manah agi anang datai sekali. Legi rita aku gak jai di kumbai deka bemain aja enggau nuan. Enti nuan bangat enda tedanti ke aku, nadai ko enggau meh.”

Aku lalu ngempas ke telipun. Nama meh kebuah Mathew tu bangat te ngansak aku enda pegigak bakanya. Aku tu ukainya indu ke deka ngereja pengawa enda bebah-bah bakanya. Gila! Aku enda ngancur ke idup aku bakanya. Belaki tumu, sedangkan aku empai nemu ngintu ruang bilik, kerja pan aku empai tetap. Kada ke agi rumpas tu aku deka ngiga kerja perintah, kerja ti tetap.

***


“Bakanya ko cerita ia Leo”
“Hurm…bakanya rupa ia. Tang ia madah nuan nadai call ia 2 minggu tu.”
“Ya amat Leo. Dalam 2 minggu tu maioh penusah nuntung bala aku. Ayak mah ke mak aku baru udah nadai pun bulan tu tadi. Ibu mah ke abak aku nadai minggu tu kemari gak, nyau betampung ulit kami tu. Dini meh aku bisi ari deka berandau enggau ia.”

“Amat gak nya neh. Ia nadai gak telipun nuan. Ia te lalu madah kediri bebini. Nuan nemu, ia ti nganjong diri ke rumah indunya. Indu kami serumah ditu. Biak amat indunya enda ambis peresa pom 3”

Nyeh…indu bakanya ke kak ia. Endang sigi nama udah lelaki, ngiga utai ke nyamai aja. Pengidup dudi ari enda di kira. Nasib enda jadi enggau nuan Thew.

Aku mina ulih murus dada ngasoh diri empu bersabar. Kapa enda ko ati aku din. Nya utai ke kak ia. Meda meh utai ulih ia ila, bakani meh pengidup ia. Walau apa pun aku tetap besampi ke pengerai seduai ia melaki bini.

“Enda ngawa meh nya Leo. Nya jalai ti udah dipilih ia. Mina aku enda puas ati ia ninggal ke aku nadai madah. Ia ninggal ke aku sedangka ia enda nemu masalah aku. Ia kelalu cepat berubah ati.”

“Auk. Aku tu enggai nyadi enda madah, laban ngasai ke nuan nyau baka ke bala diri empu. Telipun ia pan nadai dikena ia agi. Bulan 6 tu jadi meh seduai ia, tang ia endang sigi udah nama’ kediri ngagai indunya. Apai indai ia pan enda nemu daya agi. Anang agi gak kami tu mina bala ia aja. Nyaga diri enggau manah meh nuan, kapa ngarap ke ia agi neh. Mupuk aku tu. Bye”

“Bye”

Apu apai, enda nyangka Thew bangat ngenyampat nya berubah. Enti belaya sekalipun nadai meh sampai mutus ati enda tedanti ke aku. Sapa meh aku tu. Enda ngawa meh Thew, nya utai ke kak nuan. Tua pan baru bepangan, nadai pengerugi ke pangan diri. Sayau meh semaia tua puntan, pengerindu tua lebu. Enti ngenang pemanah bala nuan enggau aku, asai kak ngeransi gak ati. Tang aku naka ulih meh nyabar diri empu.

Enti ulih aku enggai betemu enggau ia agi. Enggai! Enti nitih ati ke ringat, asai kak ku keramak jak mua bini ia. Tang enggai nyadi gak..enda pia? Ukai tentu salah mah ke indu aja. Ia ke lelaki bakanya meh. Jari enti betempik sepiak aja dini kak nyadi bebunyi.

Bisi gak kaban aku ti diau enda jauh ari rumah sida ia madah, kekadang tepeda ke seduai ia melaki bini. Enti tudah tuai merening enda sengaja, nguing ke bukai gak tudah Thew. Engka enggai temu urang udah bebini meh nya. Pama enggai temu urang, anang pansut, te mendam dalam rumah.

Wai bujang, hesh…laki urang nuan nya…ukai urang bujang agi. Taja di lalai ke nuan buah rian, agi meh temu bau ia wai sayau. Bungkus ke nuan abus, tekebu meh abu ia wai ambu. Tumbak ke nuan landak, cecunggak meh bulu wai sulu. Nadai guna meh nuan nyalam kediri udah bebini.

Hassss apai…enti baka burung, udah lama aku terebai ngelayang tasik, bejalai merakak menoa, gegadai ngerembang babas, kejuh-kejuh nujah kampung. Ngichak ke enda tepansa ke ia ba sebelah kedai…ba sebelah rantau jalai. Tang, dini meh nya alah kelari. Tambah mega semenoa. Saritu enda meh bepansa, pegila lusa kada enda berimbas bau? Hah! Pama berimbas bau, lalu aku seging ia nya awak ke lalu tetungkam, jera’ ia. Apei apai…balat deh jai aku. :lol:

Sinu amat asai ati lebuh ti mending ke lagu ti ditebah DJ Cats radio tu. Ah…baka nenemu aku tu benung tusah ati…

Nadai guna ku nyimpan gambar nuan

Ukai tau enggau berandau nyadi ke pangan

Awak aku terus enda ingat ke nuan agi

Padam ke nama ku sekali

Nuan mina ngasoh ati ku benci

Asa ketegal janji


Singin ku kak nunu gari nuan sulu
Ditinggal ke nuan kena ngumpan ati aku
Ti enda asa ninga jako manis bebungai
Nyangka ku enda nerima nuan nyadi ke ambai
Perasa ku ninga jako manis nuan dulu
Mina ngeracun ati ku

Udah aku baka buah nadai isi
Nuan lalu nyau enda iboh ke aku agi
Nuan jauh…jauh…jauh
Nuan ngerari kediri

Udah aku baka bungai nadai madu
Nuan lalu terebai nadai ku temu
Nuan pergi…pergi…pergi…
Lalu nadai pulai agi.




Dikarang,
a_iE

p/s : Nadai bekait enggau ia ti agi enseput tauka udah padam seput. Amen. :)