Saturday, January 8, 2011

Kemeran jaku, adat sereta main asal bansa diri


sumber asal: http://www.1dayak.com/viewtopic.php?f=9&t=38

SRI AMAN: Bala nembiak rebak baru bansa Iban diatu dipinta anang enda keran ngintu lalu beratka jaku asal bansa diri, lalu terus ngemeranka adat asal enggau penemu tuai sida berengkah ari diatu.

Ketuai Opis Pelajar Sitak Sri Aman Walter Lamat Kiyai madah, raban bala nembiak baru ke diatu patut ngaya, ngintu sereta terus ngemeranka enggau manah semua main, adat asal, penemu tuai enggau pesaka lama asal bansa diri enggaika semua utai lenyau lalu nadai betampung.

Nya alai beduduk ari nya perintah ngena Opis Pelajar Sarawak (JPS) diatu keterubah iya ngatur Pekit Sampi/Biau 2009 ungkup kena narit sereta ngumpan pengerindu ati bala nembiak sekula bansa Iban kediatu pasal pemanah enggau penulin adat bansa asal raban bansa diri, ku Lamat nerang.

“Kitai ngarapka enggau pekit ti diatur bakatu, bala raban nembiak rebak baru diatu, kelebih agi bala nembiak sekula deka belabuh belajar sereta ensepi pemanah jaku asal bansa diri, adat, penemu tuai sereta pesaka lama ke ngelamatu nadai entu reti ba sida,” ku iya madah.

Jaku nya dipansutka Lamat lebuh ke bejadika Pekit Sampi / Biau 2009 Renggat Zon A ari atur Opis Pelajar Sitak Sri Aman ba Dewan Suarah Sri Aman kemari.

Kelimpah ari nya, iya mega ngelalau madah ngagai bala raban nembiak rebak baru Iban kediatu, enda ngasuh sida anang malu belajarka adat enggau main asal bansa diri. Sida patut keran belajar pasal tu enggaika sida enda nemu asal penatai bansa diri.

“Jaku Iban ambika banding, ulih dikemansangka ngagai tikas ke tinggi agi, enti bala nembiak kitai keran deka ngemansangka iya ngena jalai

kreatif enggau inovatif, kelebih agi nyungkakka agi pemanah tusun enggau kena jalai jaku, nambahka leka jaku sereta ngemanahka agi tempalai kena enggau tibar jaku diri empu.

“Sukut segi kreatif enggau inovatif tu mega ulih diselit sereta disilup dalam pengawa kitai sama ngemansangka adat enggau main asal bansa kitai Iban, ngambika bansa kitai Iban terus dikelala nyulut dalam pengaya enggau pemanah jaku ngagai jemah ila,” ku iya.

Nya alai Lamat ngarapka semua bala kitai bejalaika tanggung pengawa diri empu, nengkani pengerindu ngagai bala rebak baru awakka sida keran agi deka belajar pasal jaku bansa diri, adat enggau main asal bansa ke endang chukup kaya sereta dikemegahka semua di menua kitai tu.

Dalam Pekit Sampi/Biau 2009 Renggat Zon A, Wilson Indi Belayong ari SMK Simanggang dipilih nyadi champian ditangkan Gilbert Dato Adam ari SMK Saratok enggau Billy Jantan Jugah ari SMK Engkilili ba lumur dua enggau lumur tiga pekit tu.

Dalam berita bukai ke nadai sangkut paut ku Nyalau, enti nyema perintah BN ngena tanah rayat ungkup alai projek pemansang, perintah endang sigi mayar pampas ngagai orang empu tanah nya.

Perintah BN nadai kala ngambi tanah rayat pia aja, lalu enda mayar pampas. Tang parti penyakal mantai isu tu laban sida ngumbai isu tu ngasi kena ngasuh ati rayat tekuing chundung nyukung sida (penyakal), ku iya madah, kemari.

“Enti rayat empu mudah tekuing laban isu nya, orang ke rugi nya rayat empu, laban sida makin surut,” ku Nyalau madah.

Sama bisi datai Kaban Kunsil Nengeri sitak Engkilili Dr Johnical Rayong Ngipa, Ketuai Pemadah Parlimen JASA P.203 Lubok Antu Geoffery Baja Ricky Maba, ketuai opis nembiak enggau lumba Sri Aman Shyennier Jean Serit, Pemantu Luar Kanan JASA N.28 Engkilili Edwin Ancheh sereta mega bala ketuai raban bansa ba sebelah menua Lubok Antu ditu.

Arapka 1Daya' berundingka merambu programme ke sebaka ,gagaka open category.Anang nejuka nembiak sekula aja...sida iya ulih kitai pen ulih...

0 comments:

Post a Comment

Related Posts Plugin for WordPress, Blogger...

My widget | Bookmark | Share

Marketing Blogroll Center

Followers

Blog Archive

 

Copyright 2011 Iban4u My theme by Timberland, J.

hit me

Total Pageviews

Disclaimer

This blog does not host any of the files mentioned on this blog. This blog only points out to various links on the Internet that already exist and some of them are uploaded by other websites or users there. If you have any clarifications to be made or If you find any contents in this site which you think can be offensive contact me & the content will be removed or modified accordingly.

Visitor

hit counter account login page
Get a free hit counter today!
get this

analyzer

SEO Stats powered by MyPagerank.Net