pengawa beduruk

berita iban..

sumber asal: mysarawak.com

SIBU: Taja pan dunya kemaya hari tu nyau majak mansang tang pengawa beduruk bepun ari aki ini kitai bansa Iban kelia meruan mengkang digaga kitai nyentuka kemaya hari tu.

Pekara tu bisi nyadi ba rumah panjai Lunggah Jaya, Nanga Atoi, Awik Saratok ti beduruk ngaga rumah panjai baru sida.

Tuai Rumah (TR) Lunggah madahka, pengawa beduruk kediatu bisi bida ari kelia suba laban mayuh bekenaka perengka ke baru tauka moden.

“Tu mai penyenang ngagai pengawa kitai tang taja pan baka nya, baka kami ditu ke benung begagaka rumah panjai ngena simen (konkrit) bisi nanggul mimit laban nyau bekenaka ungkus ke mar,” pia ku iya madah ngagai pemberita apin lama tu tadi.

Rumah panjai sida tu dikena nganti dampa (palan pendiau ke lama) ke endur sida diau sepengelama lima taun ke udah.

Taja pan baka nya, ku iya, pengawa begagaka rumah panjai ngena chara baru mayuh begunaka pengelandik ba pengawa nya.

“Seninjik bendar mega laban bisi sekeda bala ditu ngembuan pengelandik ngaga pengawa baka nya,” pia ku iya madah.

Kelimpah ari nya, Tr Lunggah mega udah nentuka ninting hari Enam enggau hari Minggu sida ba rumah panjai nya beduruk ngaga rumah ba aum sida sebedau tu.

Lalu ba hari ke bukai, Lungah meri awak ngagai nembiak iya ngereja pengawa kediri empu.

Ba penemu Biju Enggan, 54, ngereja pengawa ngena chara beduruk tau ngelempungka siti-siti pengawa.

“Ngaga rumah panjai ukai pengawa ke senang lebih agi enti ba sepintu nya nadai mayuh tubuh,” pia ku iya madah.

Ku Biju, enti nadai mayuh tubuh udah tentu pengawa pan lubah tembu.

Nya alai ku iya, enti dikereja bebala mayuh, pengawa pan jampat agi digaga.

Rumah panjai Lunggah Jaya,Nanga Atoi ngembuan 28 pintu tang taja pan baka nya nyauka setengah bala ari sida rumah panjai nya diau ba kandang nengeri nitihka periuk asi diri baka gawa ba perintah tauka kompeni.