Adat Iban Diubah Kena Ngemajuka Bansa Iban

Pengawa tu ukai dikereja peneka ati laban bala pemesai rayat bansa Iban baum sebedau ngubah aturnya

MIRI:Perambu deka ngubah pekara ba Adat Iban 1993 ukai tuju deka ngubah adat lama ke dikembuan ari aki ini kitai kelia, tang ngubah kena ngemaju sereta pemansang bansa tu empu.Pengulu Randi Elon madah, sekeda ari adat kelebih agi ke bekaul enggau adat kawin enggau sarak sigi dikena jeman aki ini kelia, tang diatu enda tentu relevan enggau generasi Iban abad ke-21 tu.

“Kami nyadang, ba dini-dini endur ba dunya tu, enti atur sereta undang-undang udah enda engkeman enggau ubah dunya, iya ulih diubah nitihka ubah dunya.”

“Ukai reti kami deka ngubah atur, adat tu peneka ati kami, tang nengah aum ari semua pemesai enggau tuai rayat Iban.

“Kami mansik sereta ngubah pekara ke bisi kurang, ukai nukar pekara ti ulih ngemediska bansa Iban empu,” ku iya lebuh ditanya Utusan Borneo kemari.

Iya nyebut pasal penerang ke dipansutka bekau Sapit Presiden Gabung Gerempung Melanau Sarawak, Wan Zaid syed Mohdar ba surat berita Utusan Borneo kemari ke madah Adat Iban enda ulih diubah peneka ati laban nya bekaul enggau pekara lama sereta penti pemali.

Ku Wan Zain, enti komuniti Iban deka ngubah adat ke dikena sekumbang ari kelia, sida deka lenyau adat kelimpah ari ngerusakka reti adat nya empu.

Ku iya, adat enggau penti pemali ke seruran dipegai ari kelia enda patut dimodenka.

Pengulu Randi madah, penerang ari Wan Zain nya mandangka iya enda nemu pasal reti adat ke dikembuan ari aki ini bansa Iban.

“Adat enggau penti tu pekara ke enda sama. Ba bansa Iban, adat ke enda ulih diubah iya nya adat ke bekaul enggau pemati.”

Lalu, adat ke bisi dalam genteran 110 ke nagang ketawa ke orang sereta ba genteran 100 ke nagang kemi sebarang alai ba umai orang bukai patut dipansik baru laban nya dikira enda penting agi.

“Ba hal tu, kitai deka atur ti bekaul enggau kawin sereta sarak bansa Iban patut dipansik baru laban kes sarak majak nyadi diatu,” ku iya.

Iya meri chunto penyarak ba genteran 151, ke meri tujuh kebuah penyarak ke diberi pemendar dalam adat iban iya nya ‘sarak manis’ tauka sarak nadai laya.

“Reti jaku ‘sarak manis’ tu patut dipansik baru laban makin mayuh orang belaki bimi ke nitih ke atur adat Iban bekenaka kebuah nya deka sarak. Kebuah nya tadi baka ke ngemeli ka adat kawin nya empu ke patut iya sigi digaga nitihka tanggungjawab sereta pengerindu sida ke pangan diri.”

Ku Pengulu Randi, sekumbang mangku pengawa pengulu ba timpuh 100 hari, iya bisi nerima 21 kes melaki beini ke udah sarak, minta sarak (23) lalu tu enda nyengkaum kes sarak ke benung nganti dipechara ba Kut Pengulu.

“Ari 21 kes melaki bini ke sarak nya, majoriti sida ke sarak nya ngena adat ‘sarak manis’ nyadika kebuah sida sara,” ku iya.

Pasal jaku Wan Zain bekaul enggau adat sarak ba genteran 159 Adat Iban 1993 ti udah ditetapka lalu nya meh ke ukum iya, Pengulu randi madah, ukum nya ulih diubah laban kena nyaga hak bala anak ke udah ditinggalka.

“Enda salah ngubah pekara ke ulih meri pemanah ngagai mensia mayuh, kelimpah ari nya Adat Bisaya enggau Lun Bawang udah diubah ba taun 2004. Lalu, nama kebuah Adat Iban enda ulih diubah?,” tanya iya lalu nambah semina bansa Iban aja ke nemu bagi adat ke patut diubah tauka enda.

Sebedau tu, komuniti Iban ba Miri minta Majlis adat Istiadat Sarawak (MAIS) ngubah Adat Iban 1993 laban sekeda ari atur sereta ukum ke bisi dalam adat nya enda relevan nitihka ubah dunya.

Sumber : http://www.theborneopost.com/?p=9782