Wednesday, January 5, 2011

ensera iban TAJU REMAUNG


TAJU REMAUNG
Ditusun sereta dibali: Pengajar Jaime Egit, SMK Song, 96850 Song, Kapit (2008)


Lebuh maya bejalai tauka di rumah, enti tetemuka tinchin, marik, duit, buah enggau utai bukai endang enda tau diambi. Ukai semina diambi, dijengkau tauka dijapai pan enda tau. Kenu ku orang tuai, dikena nyeliahka diri kena panjuk tauka taju remaung.


     Kenu ku cherita, indu bansa Iban ti diau di menua pesisir kelebih agi menua Bagi Sarikei selalu baum bejalai enggau pangan diri. Bala indu dara nyau bekangau, beterauh bebai pangan diri mansai. “Aram wai, sama bejalai kitai, mansai!” pia ku sida ke indu. Peda beterebas bala indu nurun bebai pemansai.


     Kepuas ke bejalai, sida pan datai di Sungai Kara. Ai sungai chiru sereta dalam ai nya mayuh ikan gemian baka enseluai, buing, kenyulung enggau ikan bukai. Enti benasib, suah mega sida bulih ikan besai. Lapa dih, sida pan belabuh mansai. Kaus ke ulu, kaus ke ili peda mayuh amat ikan enggau undang. Ke ulu agi, bisi agi. Peda udah murit raga mit. Ke ulu agi, mayuh agi. Enda berasai datai ba Nanga Tisang. Asaika enggai mih sida pulai. Nyau bebungai asai ati. Benung bepilihka ikan, dia siku antara sida ke benama Tambung lalu bejaku, “Wai...nyau begeriuk perut aku. Tak enda ulih tat. Pulai dulu aku.” Amat ga tudah tuai, ketegal ke sakit jugal, nya mih nangi takutka sakit jugal nyau mulan tauka datai baru. Ukai nya semak rumah ari hospital.


     “Au, dulu mih nuan akih. Jimatka bejalai. Kami nitih dudi. Kami tu agi deka mansai. Bisi endar ikan enggau undang ba sungai tu,” ku Remi nyaut. Iya endang lama udah nemu penusah ke nuntung kaban iya Tambung. Ari mit sampaika besai, nadai kala beserara indah baka isi enggau kukut. Anang ke nyadi mayau engau ukui pan enda kala, nadai kala besengki jaku belaya enggau pangan diri.

"Au" ku Tambung. Udah madah, iya lalu mupuk bejalai.

     Maya bejalai, dia Tambung datai ba kerangan siti. Dia iya tepedaka buah sibau mansau nyau bekechinang mayuh bendar baka ke diaraka orang ti baru pulai ngembuah ba atas kerangan nya. Enda chechamang tudah Tambung lalu nyengkau sepating sibau. Dikupak iya sigi buah sibau lalu dikanit. “Manis,” ku iya bejaku kediri berandau nengali. Mapar aja umbang sibau di atas kerangan. Laluh buah sibau dibai Tambung pulai ke rumah. Igi buah sibau disimpan ba pemansai lalu iya ke agi bepating diengkah ba bau baka ke ngesan lumpung kayu.


     Datai di rumah, indai Tambung tekenyit meda anak iya pulai mansai mai buah sibau laban maya nya ukai musim buah. “Parai kitai! Dini nuan bulih buah sibau mansau nya Endu? Diatu ukai musim buah. Alit bendar ati aku. Nyau ukai ikan ke dibai nuan tang buah sibau. Kada enda taju remaung dibai nuan tu. Iga nuan bangat enda ingatka ajar niang ini nuan suba. Badu nuan makai utai sengapa,” ku indai iya kutap-kutap bejaku nganu tudah Tambung.


     Nama dih, Tambung tak semina kekesap aja. Asaika dipandam orang dada. Tekelalu kesal. Nesal laban enda berunding dulu sebedau ngereja pengawa. Amat ga tudah nyawa, bangat bam. Jari jampat amat ngambi utai orang.


     Indai Tambung endang sigi indu ke beberita sikar lebuh ngereja pengawa. Betesau mih tudah tuai ngagai sepintu-sepintu bilik. Bebai ngaga pintu kuta. Tiga puluh serak pintu kuta digaga sida serumah. Enda nganti ke apus hari sehari nya, dinga udah bekedui nyawa indu nyabak ari dalam bilik. Bekedanja derap kaki bala sida ke indu enggau anak mit sebelah ruai nuju bilik sida Tambung.


     “Nama utai bangat dikebegauka kita uchu,” pia ku aki Ungkuk ti baru pansut ari bilik Tuai Rumah.


     “Tambung aku. Udah nadai,” pia ku saut anak mit siku ka benama Entigar.
    

     “Na...dai. Er...kini penunga iya. Nama iya enggau sida Sulan mansai tadi dih,” Palui kita tu. Nadai ibuh dikebegauka nya. Udah nurun mansai iya,” ku aki Ungkuk majak ka penemu iya.


     “Ukai pia aki. Tambung udah dibunuh remaung. Pala kena pumpung. Parai! Taju remaung,” pia ku anak mit nya.


     Nya mih aki Ungkuk lalu dedui nyabak baka anak mit ngenang pemarai Tambung. Dara bungas sida serumah. Mati nengali hari, parai nengali lemai, . Bangkai iya lalu disenggai.
Bisi siku menyadi bujang Tambung ke benama Laja deka bebalas laban ti kasih meda bangkai menyadi iya enda bepala. Dia iya ngasuh sida serumah bedayaka iya lalu enda ngasuh nganjung bangkai menyadi iya. Semua engkerabun, ubat pengering tubuh, dinding bulu sida serumah ke bisi disimpan sida serumah abis diunsut ba tubuh Laja. Laja lalu bepasuk baju, betangkin ke duku ilang. Uh... bula orang indu enda tekait ati meda penyigat Laja. Naka pengering-ngering tubuh Laja lengkap ngena ngepan kena ngayau. Ngayau remaung.


     Laja lalu nurun bejalai nitihka pemai kaki. Nyau kepuas ke bejalai meraka sungai, nurun bukit, niki bukit, melungggang bukit sepiak datai mih Laja ba menua siti. Dia iya tepedaka rumah orang. “Kada enda tu, rumah Bunsu Remaung ke digiga aku ngelamatu,” ku Laja bejaku kediri. Nadai orang ninga. Dan ensurai ke endur Laja nyandih nyau beteguyat dipuputka ribut baka ti madahka nya mih rumah Bunsu Remaung. Laja duduk ba bandir kayu nya lalu ngunsutka ubat mali ba semua tubuh iya. Udah nya iya lalu nyapa orang ti bisi ba rumah ka baru udah dipeda iya nya tadi.


     “Jadi rumah kita?” pia ku Laja.


     “Jadi, lalu mih niki. Nama nuan laun endar datai. Kami ditu benung naku antu pala ulih aku di menua sepiak din.” pia ku anak Bunsu Remaung.


     “Tentu banchat tu munuh menyadi aku. Lagi dik bakih. Gamal dik jai. Empai nemu dengah aku dik nya,” ku Laja dalam ati. Laja lalu niki ke rumah. Duduk. Iya dinahka ai tuak enggau utai empa bukai. Siti nadai mih diempa iya. Mata seruran engkining antu pala ka benung ditaku bala indu remaung ba puak ruai Bunsu Remaung. Enda berasai labuh ai mata nelusur kuyu chelum manis iya. Ati seruran sinu ingatka pemarai menyadi indu iya.


     “Lapa mata nuan wai tak belai?” tanya anak Bunsu Remaung.


     ”Eh...laban tepuk asap orang ari setak nyin,” saut Laja. Nasib bendar bisi asap kepul-kepul enda balat sebelah ruai bekau orang berapi ngena api kayu. Hari maya nya ngalih lemai. Maya indu remaung bepandukka asi enggau lauk.


     Malam nya, rumah Bunsu Remaung richah rami. Sida ke nemu bepantun lalu nyadaka pantun diri. Sida ke nemu bekuntau nyau mantaika bungai pencha, betempapka papan enggau pah. Laja bungah enggau bala remaung lalu numi sida enggau ai tuak.


     Tawas hari, peda betelakak bala remaung gali laban udah kelalu mabuk. Nyau enda teangkatka tubuh diri. Bejalai pan nyau tepawir. Gegile. Semina anak Bunsu Remaung ke bedengah pala Tambung aja agi regas. Laja pan lalu berunding, ngiga akal. Berundingka chara munuh anak Bunsu Remaung nya.


     “Aram unggal. Nganjung aku pulai dik. Aku nyau enda ingatka jalai pulai ke menua kami. Nguluka aku nuju Bukit Tinggi pama mih,” pia ku Laja.


     “Au mih...unggal. Nganti ditu dik, aku ka beradu,” ku anak Bunsu Remaung.


Tinggal siku nya tama ke bilik, Laja berumban-rumban ngambi pala Tambung ka digitang ba tiang tengah puak ruai. Pala nya tadi lalu diengkah iya ba temilah. Enda lama udah nya, anak Bunsu Remaung lalu datai. Seduai lalu bejalai nuju Bukit Tinggi. Kira ngalih hari, seduai lalu datai ba tinting bukit.


     “Apu,mayuh amat tebu ditu unggal,” ku Laja.
     “Dik ka makai tebu? Lagi aku munsika dik,” ku anak Bunsu Remaung.


     Anak Bunsu Remaung ka enda nemu dalih iya lalu mantap-pemantap tebu ke bisi dia. “Lagi nuan ensepi. Ukai aku enda kala makai tebu. Menua kami din mayuh agi tebu,” ku Laja bejaku dalam ati. Tembu nya, anak Bunsu Remaung munsi tebu lalu dipangkil iya. Maya iya kusir-kusir makai tebu, Laja ke endang udah besedia ari tadi lalu mumpung pala anak Bunsu Remaung nya. Putus dua. Tepelanting pala nya tadi ngagai madang tebu. Nyau tekeching darah pansut ari rekung anak Bunsu Remaung. Meda diri ka udah tebunuhka anak remaung nya, Laja lalu manjung. Naka penginggar-inggar munyi terachat letup senapang. Manjung gaga. Parai mih anak remaung nya.


     Udah nya, Laja lalu bejalai pulai nuju rumah panjai sida ti dikumbai menua Lepung Bebelat. Bejalai kenu iya enda ngetu-ngetu. Babas, duri, tunggul endang ditujah magang. Datai di rumah, pala Tambung lalu ditampung baru ngagai tubuh Tambung. Diunsut indai iya chekur pulai, jerangau pulai enggau utai pulai ti bukai. Enda lama udah nya, kekebut kaki jari indu nya. Peda kekebut luak ati. Peda nyau angkat!


     “Sapa ti ngenanika aku tinduk bemimpi. Sapa ti ngerak aku tinduk jenak,” ku indu nya bejaku dalam pua kumbu. Kerebakka orang pua kumbu. Indu nya angkat lalu merap indai iya. Udah nya sida serumah ka bisi dia lalu ngerandau Tambung. Tudah Tambung lalu nusui diri dibai orang ke menua bukai.


     Pap! Dinga munyi semetap. Dinga tachuh bala remaung di luar kuta tiga puluh serak ka digaga sida. Seninjik bendar menyadi bujang indu nya tadi ditepu sida serumah dalam kuta tiga puluh serak. Di atas kuta nya dikelalin sida enggau bulu landak. Ati sida endang sigi ngadang bala Bunsu Remaung begigaka anak iya ti udah enggau Laja.


     “Oh...anang kitai ngelaban anak mensia. Angat tubuh enti dulu mungkal. Ukai salah iya. Aram pulai kitai,” ku Bunsu remaung mai bala iya pulai. Bulu landak nya nandaka sida dulu mungkal. Nama dih, anak Bunsu Remaung nya parai tang indu nya tadi idup baka selama.


     Nya mih kebuah kitai Iban diatu enda tau bepungkal sekalika enggau jelu tauka enggau antu. Takutka diri kena puni “Taju” remaung. Buya kena tauka makai budi. Endang udah bisi tekelanjur ngereja pengawa ti enda betul.

 
Disusun semula oleh MY PAGE BOOK

0 comments:

Post a Comment

Related Posts Plugin for WordPress, Blogger...

My widget | Bookmark | Share

Marketing Blogroll Center

Followers

There was an error in this gadget
There was an error in this gadget

Blog Archive

 

Copyright 2011 Iban4u My theme by Timberland, J.

hit me

Total Pageviews

Disclaimer

This blog does not host any of the files mentioned on this blog. This blog only points out to various links on the Internet that already exist and some of them are uploaded by other websites or users there. If you have any clarifications to be made or If you find any contents in this site which you think can be offensive contact me & the content will be removed or modified accordingly.

Visitor

hit counter account login page
Get a free hit counter today!
get this

analyzer

SEO Stats powered by MyPagerank.Net